ԼՇՀ դասընթացքի Բ. շրջանի (2023-2025) Գ. եռամսեակի վերամուտը տեղի ունեցաւ շաբաթ, 7 սեպտեմբեր 2024-ին։ Արձանագրուած քսանհինգ ուսանողներէն ոմանք կը բացակայէին, անհանգստութեան կամ երկրէն դուրս գտնուելու պատճառներով։
Դասընթացքի տնօրէն Վիգէն Թիւֆէնքճեանի բարի գալուստ մաղթեց ներկաներուն եւ յայտնեց, որ այս եռամսեակը ԼՇՀ դասընթացքի եօթներորդն է, բան որ գոհունակութիւն կու տայ դասընթացքի կազմակերպիչներուն, մանաւանդ անոր համար, որ արձանագրուողներուն մէջ կան Սբ. Յակոբ ազգային վարժարանէն 2023-2024 տարեշրջանի շրջանաւարտներ։ Ան նոյնպէս բացատրեց, որ դասընթացքի յայտագիրը կազմուած է նախապէս դասաւանդուած նիւթերէն ոմանց՝ որոշ փոփոխութիւններով կրկին ներկայացմամբ, եւ կամ՝ դասախօսներէն մի քանիին վերադարձով։ Այս եռամսեակին հրամցուող նորութիւնը պիտի ըլլայ, ըսաւ Թիւֆէնքճեան, ոչ-ստեղծագործական գրականութեան (նամակագրութիւն, փորձագրութիւն, ճանապարհորդագրութիւն, կենսագրութիւն եւլն.) աշխատանոցներու կազմակերպութիւնը։ Ապա ան ուսանողներուն ներկայացուց ընթացիկ եռամսեակի յայտագիրը։
Օրուան դասը սկսաւ առեւտրական ծանուցումներու աշխատանոցով։ Իբր նախապատրաստութիւն, Թիւֆէնքճեան ուսանողներուն ներկայացուց 1900-2024 տասնամեակներուն հայկական մամուլին մէջ երեւցած տասնեակ մը առեւտրական ծանուցումներ։ Ահաւասիկ մի քանի նմոյշ անոնցմէ.