ԼՇՀ դասընթացքի երկու գլխաւոր բաժիններն են վայելուչ արեւմտահայերէնով գրաւոր եւ բանաւոր արտայայտութեան մարզերը։ Իւրաքանչիւր դաս կը միտի ամրապնդել դասապահերու ընթացքին այդ մարզերուն մէջ ուսանողին ձեռք բերած գիտելիքները։ Առ այդ, շաբաթ, 19 հոկտեմբեր 2024-ի դասին յատկացուած էր բանաւոր արտայայտութեան վարժութեան մը, որու ընթացքին ուսանողները պիտի լծուէին հարցազրոյց պատրաստելու աշխատանքին։
Աշխատանոցը վարողն էր դասընթացքի տնօրէն Վիգէն Թիւֆէնքճեանը։ Ան նախ բացատրեց, թէ աշխատանոցը պիտի ընթանար երկու բաժիններով։ Առաջինին մէջ, ուսանողները պիտի ստանային անձնաւորութիւն մը նկարագրելու կամ անոր բարեմասնութիւնները թուելու անհրաժեշտ հարիւր ածականներու ցանկ մը. երկրորդ բաժինին մէջ, ուսանողները մէկզմէկու պիտի տային քսան հարցումներ, անոնց պատասխաններով կազմելու համար իրենց խօսակիցին դիմաստուերները։
Առաջին հերթին, ուսանողները բարձրաձայն ընթերցեցին իրենց տրամադրուած հարիւր ածականներու ցանկը, կանգ առնելով իւրաքանչիւրին վրայ, իրենց հարցումներով զայն լաւապէս ընբռնելու, այլեւ անոր թելադրականութեան (connotation) եւ գործածութեան շրջարկի (context) մասին յստակ պատկերացում մը կազմելու համար։
Ուսանողները մեծաւ մասամբ ծանօթ էին իրենց ստացած հարիւր ածականներուն, իսկ անոնց որոնց կը հանդիպէին առաջին անգամ, Նայիրի առցանց բառարանին օգնութեամբ կարողացան իւրացնել տուեալ բառերուն իմաստները։
Դադարէն ետք, իւրաքանչիւր ուսանող աշխատեցաւ իր զրուցակից դասընկերոջ հետ։ Անոնք փոխադարձաբար իրար տուին քսան հարցումներ եւ նոթագրեցին պատասխանները։ Աւելի ուշ, իւրաքանչիւր ուսանող ներկայացուց իր խօսակից դասընկերը, հիմնուելով իր ստացած պատասխաններուն վրայ։
Նշենք, որ տրուած հարցումներու պատասխաններէն ոմանք իրենց զուարթամտութեամբ մեծ բաւականութիւն յառաջացուցին ուսանողներուն մօտ։